అకవిత్వం

చాలా రోజుల వరకూ ఈ దారిన రావు నీవు

కొన్ని రోజు వారీ పనులూ, చేయక తప్పనివేవేవో
ఇష్టమయ్యీ ఇష్టం కాకా-


మనుషులతో మాటాడతావు కానీ మాటలు వుత్తి శబ్ధాలను తప్ప మరేమీ పలుకక
వుంటావు వూరికే ఒక పూట గడవడానికి ఒక రోజుకు ఊపిరి సలపని గోరీని తవ్వి పరుండబెట్టడానికి


ఎడతెగని శీతల ముద్ర
గడ్డకట్టుక పోయి నీతోటే నీ కవిత్వమూ


ఒప్పుకోకపొవడానికిక ఏమీ ఉండదు
చెప్పడానికి నొప్పే అయినా మూసుకపోయిన కవాటాల అవతల
కొన్ని యుగాల దూరాన


కవులు చనిపోయీ
కవిత్వం ఇగిరి పోయీ
తిరిగిన దారుల పాడువడి ముళ్ళు కాసీ-


చాలా రోజుల వరకూ ఇటుకేసి రానే రావు నీవు


ఉన్నావని చెప్పడానికి
ఉండడమంటే అన్నిటినీ కూడగట్టుకొని
పూసిన ముళ్ళ చివరల ఒక్కొక్క నీవుగా పూయడానికి


చాలా రోజుల వరకూ ఇటుకేసి రావు కదా నీవు