గెలుపు మరీ ముద్దొస్తుంది
మత్తెక్కిన దాని వాసనలో లోకం కవి పులకాంకితమవుతుంది
వేల పరాజయాల నడుమ నువొక్కడివే గెలుపు గుర్రంపై ఊరేగే ఊహ
నిన్ను చిత్తుగా లోబరుచుకొని తన్మయత్వపు డోలికలపై
ఊపుతున్నప్పుడు ఈ కాలానికి ఒకే ఒక్క లక్ష్యం ప్రకటితమవుతున్నది
చావు, హననం, మృత్యు క్రీడ
దౌర్భాగ్యుల ప్రారబ్ధం
గెలవడమెట్టాగో చూడు
ఒక్కో గెలుపు కథనూ పుక్కిట పట్టు
గెలవడం కల
గెలుపు కళ
ఆవరించుకున్న ఆకాశం దాటి
విస్తరించుక నిలుచున్న దృశ్యాలను దాటి
చెట్టును దాటి చెట్టు కొమ్మలను దాటి
వొంటిగ నిలుచున్న పక్షికన్నును చేధించే
అర్జునులవడం ఇప్పటి అవసరం
మృత్యువును అవతలికి తొయ్
చేతులకంటిన నెత్తురు కడిగి పారెయ్
గెలిచిన వాళ్ళను కావలించుక తిరగడం
నువ్వే గెలుపయినంత పుణ్యం
వచ్చిపొయ్యి ఒట్టిపోయిన కాలానికి
నువ్వే ఒక మోడీ అవ్వచ్చునో ఏమో
కామెంట్‌లు లేవు:
కామెంట్‌ను పోస్ట్ చేయండి