బంక బేదులు

ఓఫిక లేక అట్లా చేరగిల పడి
చదువుతున్న పుస్తకాన్నిభారంగా బోర్లా పడుకోబెట్టి
కాసేపు గాలిలోకి అటుపైన నీలోకి శూన్యంగా చూసుకొని నీరసంగా అనుకుంటావు కదా
ఎదురయే అనేకానేకం కన్నా
అమర్చి పెట్టిన దానికి కాసింత ఆవలికి జరిగి
ఎప్పుడూ ఏదో వెతుకుతున్నట్లుగా ఉండే "క్రైం అండ్ పనిష్‍మెంట్" సెమ్యవ్ జహరోవిచ్ తాగుబోటు అన్వేషణల కన్నా

కడుపులో మెలి తిప్పినట్టుగా ఏదో కదలడం
ముక్కుతున్నప్పుడు ముడ్డిపీకుడే నయంగా ఉంది

తెలిసిన దానికన్నా
నీ దేహంలో దేహమై ఇంద్రియాల ప్రతిఫలనపు అనుభూతులలో
నిన్ను ఇరికించుకొని లోకాలనన్నీ చంకనెట్టుక చూపించే దానికన్నా

చిక్కినట్టే చిక్కి తెలిసినట్టే తెలిసి
అవ్యక్తానికి జారిపోతూ ఒక నిరంతర ప్రేలాపనం నీతో నడవడం

నిజంగా ఎంత కష్టం