సన్నని తుంపరలో నీరెండ కరిగి కురుస్తున్నపుడు
గడ్డిపరకపై సన్నగ నవ్వే మెరుపులాంటి ఆకుపచ్చని భాష
తడిసి ముద్దయిన దారుల గుండా
కోరికోరి అనాచ్చాదితమైన దిసపాదాలతో-
గుప్పిట పట్టిన పాదాల కింద సన్నని జారికతో దారులు కరుగుతున్న మెత్తని స్పర్శ
ఒక గడ్డిపోచలా మారి
నిజంగానే కొన్నింటిని కోరి కోరి కావలించుకుంటాం
ఇరు కొసలకు ముడి వేసి
విచ్చిన మన దోసిలిలో మనమే మెరెసే నీరెండగానూ
సన్నగ కురిసే చిరువానగానూ మారతాం
చేతులు చాచి చుట్టూ పరుచుకున్న అడివిలా
నడిచే పాదాల కింద కదులుతున్న దార్లలా విస్తరిస్తాం
ఎక్కడ నుండో వినపడే అఙ్ఞాత గొంతుకల స్వర కంపనాలలో
మెదిలే ఏదో తెలిసీ తెలియని సంకేతమై రెపరెపలాడతాం
నిజంగానే కొన్నింటిని కొన్నిసమయాలలో
కోరికోరి కావలించుకుంటాం
కామెంట్లు లేవు:
కామెంట్ను పోస్ట్ చేయండి