విదళనం

చేతనలనన్నింటినీ
సుషుప్తిలోనికి జార్చి
రాసుకున్న ఒక్కో మాటనీ నిశ్శబ్ధంగా పలక చెరిపేసి
తన లోపల తనే ఎక్కడో మణిగి
ఉండీ ఉండీ విస్పోటనమయి

ఎవడి లోకం వాడిదయిన కాలాలకు కావిలికానిగా
ఒక్కడే తల వాకిటికావల
మట్టి కొట్టుకొని శిరస్సుపై ఖగోళ ధూళితో
విశ్వాంతర్గత రహస్య సంభాషణలకెక్కడో చెవినొగ్గి

తనే ఒక దారిగా విస్తరించి నడుచుక పోయే
మనుజుడొకడున్నాడు నాయనా
మనుజుడొకడున్నాడు

తలుపు తీయ్ కాసింత
అటునూ ఇటూనూ వేరు చేస్తూ పలుచని పొర ఎక్కడుందో వెతకాలి
పగిలిన ఒక్కో ముక్కా కలిపి ఎప్పటికైనా వీలవుతుందేమో అతకాలి

తలుపు తీయ్ నాయనా తలుపు తీయ్

ఒకరోజు

పాపా నిన్ను చూసాను

నల్లని నీ కన్నుల ఆవరణంలో ప్రసరించే తడి వెలుగులో  నిన్ను చూసాను

తేరిపారగ చూసే ఒక పువ్వు
తన లేలేత వేళ్ళతో ముట్టుకొన్నప్పుడు సుతారపు రేకులు రేకులుగా
విప్పారుతూ నిన్ను చూసాను

నీ స్పర్శల పులకింతలో మొలకలెత్తి మన్ను దోసిలి పొరల దాటుతూ నిన్ను చూసాను

వొడలని తేజమేదో నీ చుట్టూ పరిభ్రమిస్తుండగా
మనుషులు చేసే ప్రయాణాలలో తరుచూ ఎందుకంతగా చెరిగిపోతారో తెలియని
సంభ్రమంతో నిన్ను చూసాను

నీ తేజపు సౌందర్య దీప్తిలో
ఒక భాష్పపు దీపమై కరిగి చెంపల జారి నిన్ను చూసాను

పాపా నిన్ను చూసాను




  

నిద్రా స్నానం

నిద్రా స్నానం

ఒక రోజు నీలో దగ్ధమై 
తిరిగి మరోసారి కొత్తగా మొలకెత్తడానికి


చాలా సార్లు ఏమీ ఉండదు

ఒక చిన్న ఆధారం ఊతగా
పైకి లేవబోయే పసి బాలకుని ప్రయత్నం అంతే

నిన్న గురించి
మాట్లడడానికి నా దగ్గర ఏమీ మిగిలి లేదు

దాటి వచ్చిన దూరాల కొసల నుంచీ
మరో దూరానికి ప్రయాణం

చాన్నాళ్ళకు

జల ఎండిపోయిన
సందేహస్పదుడొకడు ఉబుసు పోక
రాసి చెరిపేసుకున్న కొన్ని వాక్యాలు:

పిల్లలు పెద్ద వాళ్ళను అనుకరిస్తారు

ఒక దారి ఏదో కనుగొనేదాకా
తమ వెనుకటి వారిని కాసేపు గౌరవిస్తారు

పాప అమ్మ నైటీని తొడుగుతుంది
బాబు నాన్నతనాన్ని అనుకరిస్తాడు

కాసేపే అనుకున్నా
వాళ్ళు వాళ్ళ పూర్వికుల శరీరాల్లోకి తప్పొప్పుల మినహాయింపుతో
ఇష్టంగా పరకాయ ప్రవేశం చేసి
కొన్ని విలువైన క్షణాలకు పటం కడతారు

పిల్లలకు కాలంలో వెనక్కి తిరిగి చూసుకోవడానికేమీ
ఉండదు కదా