అమ్మకు ప్రేమతో

అలలను సవరిస్తూ దుఃఖపు సడిలో

ఒక ప్రవాహం ముంగిట నిలబడ్డాను


దరులను ఒరుసుక పారే నదికి

ఈ వైపు నేను ఆవైపు నేను


ప్రవాహం ఒక దూరమే కాదు

ఇద్దరినీ కలిపే ఒక దగ్గర కూడా

2

బహుశా నదికి తెలియదు

అనేకానేక చలనాల నడుమ గిరికీలుకొట్టే పక్షికీ తెలియదు


ఒకే సమయంలో సమాంతరంగా రెండు కాలాలు

అన్వేషణల ఒరిపిడిలో ఇద్దరు మనుషులు

3

నది ఇవాళే మా ఇంటి కొచ్చింది

యుగాలన్నీ ఇన్నాళ్ళూ ఉత్తినే దొర్లి పోయాయి


నది అంచున కవిత్వం

ఇప్పుడే కదా మొదలయింది


ప్రవాహం ఒక దూరమే కాదు

ఇద్దరినీ కలిపే దగ్గర కూడా

4

అవ్యక్తం ఒకానొక ఒత్తిడి


ఒంటరి తీరాలను అలా మోసుక తిరగడం

ఆమెకూ తెలుసు నాకూ తెలుసు


మాటలు చాలని ప్రతి సారీ

ఆమె నా వైపు ప్రేమగా విస్తరిస్తుంది


నేను ఆమెకు అర్థమవుతాను