రీస్టోరింగ్ పాయింట్

అపురూపమైనవి ఎలా రూపొందుతాయి?

ఒక ప్రత్యూషానికి ముఖం ఎదురు చేసి
కొద్ది కొద్దిగా విచ్చుకునే లోకపు
రంగులలో నీవు

లేదా నీవే నీకు తెలియకుండా కొన్ని తుషార బిందువులను
దేహంపై విప్పారే రెక్కలుగ చేసుకొని
మెలమెల్లగ రేకులు విచ్చుకునే అనుభూతి

కొన్ని గులాబీ వర్ణపు కలలను
తన చేతి వేళ్ళ కదలికలతో సుతారంగా నీ చుట్టూ మంత్రించి రాసే
అప్పుడే పుట్టిన పసికందు

లేదా సున్నితమైనవేవో నీలోనే మెదలి
నీ చుట్టూ నీవు కొన్ని కొల్పోయినవాటినేవో తలచి, తలపోసి
ఒక ఆలంబన కోసం వెతుకుతూ

మళ్ళీ మళ్ళీ నీవు నీలోంచీ పుట్టుక రావడం