బతకడానికెంత ప్రేమ కావాలి?
దోసిళ్ళకొద్దీ జీవితానికి ఒక సన్నని హసనపు రేఖలా
నిజంగా బతకడానికి -
బతకడం అంటే ఏమిటో
అతనికి లాగే ఆమెకూ తెలుసు
లేత వెన్నేల రాత్రుల్లో మెల్లగ తాకే చిరుగాలిలా
ఒకింత మాలిమికే సంతుష్టి చెందే బుజ్జి కుక్క పిల్లలా
ఆమెకు జీవితాన్ని ప్రేమించడం తెలుసు
ఆమె శాత గంభీర ముద్రతో
జీవితం ముందు వినయంగా నిలబడేది
జీవితమిచ్చిన దానికి పదింతలుగా
తిరిగి జీవితాన్ని ప్రేమించేది
అతడూ అంతే
మంద్ర ఉచ్చ్వాస మాలికలతో
జీవితాన్ని సున్నితంగా స్పృశించి పలకరించేవాడు
ముని వేళ్ళ కొసలతో ప్రాణ దీప్తిని
తన చుట్టూ నులి వెచ్చగా అలంకరించేవాడు
జీవితం అతనికి వరీనియానిచ్చింది
వరీనియా అతనికి-
పవిత్ర రోమ్ సామ్రాజ్యపు దరహం మీద
వారిద్దరూ తమ కాలానికి గొప్ప తావినద్దారు
అవేవీ రోమ్కు తెలియవు
చేయి చాచినప్పుడల్లా
నెత్తురూ నాగరికతా కలగలిపి
నేలకు పులిమి రొమ్ము విరుచుక నడిచే రోమ్కు అవేవీ తెలియవు
రోమ్ సరిగ్గ ఇప్పటి హైటెక్ సిటీలా ఉండేది
అంగుళం అంగుళం ధ్వంసించుకొని
విదేశీ పెట్టుబడులతో తనను తాను పునర్నిర్మించుకొనే
"విజన్ ముంబాయ్"లాగా ఉండేది
మల్టీ లైన్ రహదారులతో
భయద గంభీరంగా నిలబడే మహా నగరాల్లా ఉండేది
అయినా వాళ్ళిద్దరూ లేకపోతే
రోమ్ రోమ్లా ఉండేది కాదు
వాళ్ళ లాంటి మనుషులూ వారి వారి ప్రేమలూ లేకపోతే
రోమ్ కేవలం ఒక దిష్టి బొమ్మ
పురా కాలపు ప్రాణ రహిత సరీసృపం
వాళ్ళు రోమ్ను ద్వేషించీ ప్రేమించీ
ధ్వంసించీ తిరిగి నిర్మించీ మహా ప్రళయమై విరుచుక పడి
రోమ్ నాగరిక చిహ్నాలుగా శిలువపై వేలాడి
ఒక దీర్ఘ కాలపు వ్యధను చరిత్ర ముఖం పైన
ప్రేమగా అద్ది పోయారు
వాళ్ళ లాగే వరీనియా-
రోమ్ ఖడ్గ చాలనపు పదునంచు కొసలపై
అతడూ అతని పరివారమూ నెత్తుటి ముద్దలుగ
ధూళిలో కలిసాక కూడా
ఆమె అతడిని ప్రేమించింది
అతడిని ప్రేమించినట్లుగానే
వినయంగా జీవితం ముందర నిలబడి
జీవితమిచ్చిన దానికి తిరిగి పదింతలుగా
జీవితాన్ని ప్రేమించింది
రేపటికి రూపు కట్టి
గొప్ప దయతో అతడిని మన ముందు వదలి పోయింది
ఇంటరెస్టింగ్
రిప్లయితొలగించండిఅద్వితీయం
రిప్లయితొలగించండిచాలా బాగుంది. మళ్ళీ ఒసారి స్పార్టకస్ కళ్ళముందు కదలాడింది. అవును వాళ్ళిద్దరూ లేకపోతే
రిప్లయితొలగించండిరోమ్ రోమ్లా ఉండేది కాదు.!