అన్వేషణ

పొరల రాతిరి తిరిగి తిరిగి
దారులన్నీ చెరిగి
కలగలసి కదలని డొంకయి
వెతుకుతామా ఒక తెన్ను కోసం-

దొరకదు
కలిపికుట్టగల మాట
పలుకదు కొసల చివరల చెదిరి కలవని బింబపు ముడి

దృశ్యం విరిగి తునాతునకలై పరిపరి విధాల పగిలిన అద్దంలో
కొంచెం కల కొంచెంవిరామం
సుప్త చేతనం కలవరం భయం వాంచాన్వితం

ఒక చోట మొదలుపెట్టి ఎక్కడికో ఇక తోవ
గిర్ర్రున తిరిగి రంగులు అలుముక పోయిన తెల్లని చీకటి

కళ్ళు వెతుకుతాయి ఇక కనుగుడ్డుని

రాత్రిని వెతుకుతూ
ఒకడు  తనను కోల్పోయాడట